和田家 有機黑木耳膠原露

近期飲咗咁多正常嘢…我諗大家都睇到厭，所以決定挑戰枝奇怪嘢…嗯，黑木耳…好明顯望到個樽已經覺有伏，一於就挑機飲勝！ 今次主角係來自台灣和田家嘅有機黑木耳骨膠原，仲要注明草本漢方，咁鬼大段形容及描述，今次肯定會仆街啦…比錢果刻手都震埋，開蓋一刻甚至有個心都離一離嘅感覺… 正式試味，我發覺氣味上好清淡，無預期中的草青味，需知呢類草本飲品，開樽一刻實有種腥味，今次呢枝黑木耳就完全無，實際飲第一口，感覺似無糖涼粉水，味覺上完全估佢唔到，本身預計的怪味與草臭，幾和少少都無出現過，至於內容物就係大量黑木耳碎，由於機器切碎關係，本身好零散唔覺有黑木耳感覺，或者話似綠豆蓉仲更接近。 正式結案陳詞，和田家黑木耳係正常味道，打破健康飲品必怪味的原則，糖分佢係每100ml/3.9g，又真係比唔少飲品低，如果想試奇特底糖健康飲品，又怕買咗貴嘢兼中伏，呢枝係唔錯嘅選擇~ by 尼基達 #飲品冒險 #DrinkMe

#和田家 #黑木耳 #膠原 #香港