秋林。格瓦斯

我認為比起介紹好飲,入得口嘅飲品,介紹一啲高風險,中伏指數爆燈的飲品,肯定更加有價值,起碼可以幫大家省番幾蚊,同時人生污點可以減少一個,因此我會認為自己的高尚行為,理論上應該可以清洗我的罪,死咗係值得升天嘅... 至於點解我要用咁大段引言!?因為我要介紹的飲品,我已經列入三十年人生中,第二難飲及絕不會再飲第二次嘅嘢 - 秋林。格瓦斯！！！ 事情係咁嘅...果次我上大陸去一個記者會,大家食完飯回酒店期間,因為酒店提供得2枝水,我地又信唔過酒店果啲水煲,唯一可以依靠就自然係便利店嘅樽裝飲品,好死唔死我見到呢枝類似茶嘅嘢...我起初都無諗過要飲佢,不過見個包裝幾靚,成個感覺好有格調,咪攞上手睇睇囉...嘩...講到用咩燕麥,點精製...好似好Pro...我諗或者似酒咁掛...原本諗住買枝2L裝,好彩行家話中伏咪大檸樂,所以我就買枝細嘅試下...我絕對覺得佢救咗我,否則諗成2L的話,我應該已經奔天... 至於呢枝「秋林。格瓦斯」,佢真係好似佢個名咁架...一開樽已經有陣Gas味道飄出嚟,果一刻我就知自己中伏,不過點都好...買咗就要飲,呢啲先係勇者應有的態度,我就約略飲啖試試啦...頂,佢唔係燕麥啤酒味道,而係燕麥麵包味道!!! 嗱...你無睇錯,我無寫錯...真係燕麥「麵包」味,我飲第一啖的時候,味蕾上的滾動仲強烈過陳蕾士聽Rock and Roll,心情就好似睇緊Lady GaGa唱緊忐忑一樣...我係酒店房大大聲咁講咗一個「屌」字...然後睇睇呢枝神之水滴到底用咩成份去做...我睇完就明白咩叫哭笑不得,因為佢大大隻字寫「麵包提取液」,若果你唔太明白咩意思,你可以落樓下百佳或惠康,買幾條嘉頓燕麥麵包,拆袋將麵包沉落一桶水入面,沉夠幾個月之後,你再係果桶水筆一匙仔出嚟飲,我諗果種味道應該幾接近呢枝嘢... 總括而言...呢枝嘢係我人生之中,第二後悔飲過嘅嘢...呢枝神之水滴,我就飲過架啦,所以大家可以唔洗再試...當然,若果你想自殺,但又唔肯定自己係咪真係想死,你就可以試試飲一啖,飲完你會覺得人生無嘢差得呢一瞬間,可能你會渡過到低潮,甚至可以谷底來一個蜈蚣彈... by 尼基達 #飲品冒險 #DrinkMe

#秋林 #格瓦斯 #中國 #伏飲