可爾必思薑味乳酸

身為一隻三分正經七分神經嘅獅子，都係時候開返個神經 mode，費事我太正經啲 post 無人睇。 講返呢支懶 bling bling 咁嘅物體，如果你好似我咁見到個薑字就狗衝，你好快就要付出沉重代價。 咁，首先佢係薑+Calpis（可爾必思），我完全想像唔到乳酸同薑點溝埋一齊變成一隻碳酸飲品？飲品冒險精神就係唔知先要飲吖嘛。飲一啖，唔覺薑，唔覺乳酸。碳酸飲品通常入口好 refreshing，最爽就係 feel 到啲氣泡充滿口腔，呢支就神奇在飲落一兩秒已經好似走晒啲氣咁，有陣極強嘅代糖味蓋過。 咦咪住，代糖味？ 再望望成份表。頂，真係有阿斯巴甜（Aspartame，常見代糖）。而最有趣嘅係，成份表第一項係 sugarS（高果糖糖漿及糖）。 第一成份係糖，但又有代糖。一邊背負住飲糖水嘅罪疚感，一邊飲埋啲代糖落肚，我望唔透。 上面啲高果糖糖漿呀阿斯巴甜係乜東東？之後再同大家介紹吓。三個字：唔係好嘢。 By 拉岸 #飲品冒險 #DrinkMe

#可爾必思 #Calpis #梳打 #碳酸類 #乳酸 #薑味 #日本